الشارع مترشق أسود
|
|
الشاعر نبيل محمود كتب قصيدة الشارع مترشق أسود ريثما فض الأمن تظاهرة حركة كفاية ..جلس فى مقهى قريب
ولأنه شاعر الشعب خرجت كلماته لتكشف رعب النظام الحاكم من تظاهرة لا يملك رجالها سوى الهتاف ضد الظلم والقهر والنهب المنظم لثروة وطن بحجم مصر...ا
أيها الشاعر النبيل لا نملك سوى وسام الإحترام
مصر مدينة لك ..ماهر سيف
الشارع مترشق اسود
متخطط أزرق
مش بحر عميق
ولا زفت طريق
ولا عزا منصوب
دى ملابس سود
لبساها جنود
وسلاح وخوذات
مع شوم ودروع
ميَّـات ، ميَّـات
لأ .. دول ألوفات
و كتيبة كلاب
واقفين بالصف
بولدوج وولف
واقفين جاهزين
ينهشوا
جعانين
والخط ألآزرق
صف طويل
م ألعربيات
ع ألجنبين
مليانه تيران
التور ، طنين
لو ريح إيده عليك
تتفك إتنين
عملت غشيم
وسألت فيه إيه ؟
قالوا لى دى حرب
ما بين ألبيه
ومعارضين
وأوامر جات من فوق
نعمل كام طوق
حوالين ألناس
يمشوا بالذوق
أو نضربهم
وإن طالت ألعاركة شويَّـه
بنخطفهم
هتافات .. هتافات
دستور باطل
ورئيس
صورة وعاطل
بيقولوا
يسقط حسنى مبارك
العدل ما هوش موجود
وسرور جاهل
***
إلراجل خايف وبيدفع
واحنا بنقبض وبنمنع
كـل ألهتافات
نجهض كلمات
بتقول الحق
وطالبة الحق
وعدل وحريَّـة
حريِّـة آيه ؟
أنا نفسى محبوس جوَّا ألبدلة
من غيرها أشحت فى إلسكة
خلينا نرد على سؤالك
موضوعنا : تآمين ألسلطة
نحبس كام واحد ، ما يضرش
ويموت كام واحد ، ما يهِمِّـش
ألراجل خايف على نفسه
واحنا قبضنا وبنساعده
**
إيه يعنى ألظلم
دلوقتى دا عِـلم
له مستشارين
قاعده تففن
فى عذاب ألناس
وازاى بتخلي ألواحد يتجنن
تعذيب بالنار
خلع ضوافر
وغيره كتير
ما تسيبش آثار
وإن سابت
عين عورة
إيد مكسورة
أو مبتورة
عندنا شهادات
جاهزة على بياض
نطلب تعويض
إزعاج سلطات
ـــــــــــــــــــــــــــــــــــــــــــــ
محـو ألأُمِّـيـة
قول م إلأخر ليه تتعبنى
انت عاوز آيه فهمنى
قلت لى مره : انت متنبل
جاهل ، أُمِّـى
إمشى إتعلمإتعلمت وخدت شهاده
وعرفت أقرا وبأكتب وأحسب
قلت لى تانى : عقلك صَـدَّى
ولازم ينضف
روح إتثقفشديت حيلى ، عرفت إلتايهه
من جغرافيا للغه لسياسه
ولبسى أفرنجى ، وأكلى بشوكهوشفت أفلام فى إلدش خطيرة
قلت : إتطور عيش إلموضه
جيبت أغانى جديده رقيعه
حفظت إللزمه
مشيت ع إلواحدهفى إيدى إلخلوى وراكب إلموجه
دخلت إلنت وشفت إلخَيـبَه
ــــ
جاى بتقول على وعى سياسىروح إتأنـدِل
دانت مدهول
نفخَـه وفَشـخه
لكن ع ألفاضى
جيت بريَـالتَـك ، وعالجناها
كنت تِـتَهْـتَـه ، فَـوِّتـنَـاهاوإلملاعين عملوك شُخشـيخَه
دا ألمَفعُـوص فى إلكَـفر بيفهم
لو وَدُّوه أمريكا ، يديرها
وها يتواضع مش يتمنظر
ولا يعمل لنا طيار ولا دكتور
وإذا كان قصدك وعى سياسى
إنى أغمض عن بلاويكم
وأجرى أهلل مع تهـبـيـلكم
وأبقى مغمض على تزويركم
تبقى شهادتك ورقة أونطة
ونوديك محو إلأُمِّـيَّـه**********
مش كفايه كفايه واحده
مش كفايه كفايه واحده
اكتبوا مليون كفايه
اصرخوا ملايين كفايه
قد تشريدنا ف بلدنا
قد جوعنا وعجزنا
قد كل ثانيه اتحبس فيها بريىء
اتظلم فيها ضعيف
قد كل لحظة خوف ورعب
عاشها واحد مننا
دخلت لبيت فى الفجر
ومهما كان هو السبب
قد كل اسره فيها عاطل
فيها بائس ، فيها يائس
قد كل المحرومين ، المنداسين
المفجوعين فى امالهم
فى حياتهم فى نفسهم
قد كل قرش اتصرف
من غير رضانا وعلمنا
اتسرق ، اتنهب ، ضاع علينا
راح لغيرنا ، غصب عننا
قد اللى ضاع من وقتنا
واللى راح من جهدنا
من لحمنا ودمنا
نرجى السراب على مفيش
قد الرشاوى والمحسوبيه
قد الدعاوى الباطله
قد كل حبة رمل من ارض مصر
اشتراها ، داس عليها الاجنبى
قد كل كلمه زايفه
وصوره فاسده
غشوا بيها الناس الطيبه
لخبطت عقلى
صمتك فازعنى
وحير لى فكرى
ما بقتش فاهم
اذا كانت مظلوم
وللا انت ظالم
غريب فى بلدك
محبوس فى جهلك
حا لـك يبكى
غرقان فى فقرك
تشحت ، تعانى
دايماً مطاطى
سلمت دقنك
هدروا كرامتك
نهبوك .. تخبِّـى
سرقوك تدارى
خايف الفضيحة ؟
دا انت الدبيحة
ومهما عملوا
بتعمل أخرس
وأطرش أعمى
وتقول دا رزقى
مكتوب وقدرى
مظلوم وكاتم
كسلان ونايم
وبتشكى ربَّــك ؟
ما أنت إللى راقد
على سطح بارد
مش راضى تنطق
تصرخ وتِـزعَـق
تقول يا حقِّـى
وحــق وِلـدى
أفديه بروحى
داه تار يا أخويا
ولِسَّــة طازة
بين ألأبالسة
والمصراوية
من كل ناحية
ها تسيبه
تهرب ..؟؟
البييت ها يخرب
ويشردونا
ويبيعوا فينا
عبيد ، سبايا
ويحبسونا
لو خرَّجونا
نلبس ملايا
زى الولايـا
وتبقى خيبتك
بالويبة يابا
وانت إللى ظالم
ظلمت نفسك
ظلمت اهلك
وظلمت بلدك
ومن قاموسنا
نمحى الرجولة
ونمحى الشهامة
ــــــــــــــــ
Create a free website at Webs.com