رد استجواب

تستجوبونى وتحرجونى .... يا ويلكوا منى

بس اما أخلص وامشى ، ح تدوقوا سخطى

 غنا  ، وسيبنا ا لناس تغنى ، جبنا غوازى

ولا فيه رقابه على لبس عارى ولا ع المعانى

فاتحينها بحرى ، مايوهات بكينى للأمزجيه

 واحنا   كمان  نعرف  نغنى ....  لكن عليكوا

 وأ دى المعارضه نازلين شتيمه من اللى هى

فى الذات داهيه والسلطانية  والأرزقيه

بينقضونا  ويبستفونا  ويعاندوا فينا

واخد ين راحتهم ، لا فيه قضايا ولا أمن دوله

لا بنحاسبهم ولا بنقاضيهم  ...  ديموقراطيه

ولا بنقرا   ولا أى كلمه م  اللى  يقولوها

 العيش ، طلبنا والصين ها تبعت ألفين يوماتى

توزيعنا عادل على البطاقه من غير  وساطه

وأديكوا   شفتوا ، الفول  وجالكم  بدل  حصانى

كلتوا  ؟ .. شبعتوا ؟   طب  لسه  لحمه من السودانى

دى  لما  توصل  وهاتدقوها ....    تبقوا   نباتى

 حق الطفوله لازم كفوله من الحديثه

فيها الكيماوى يخلى بولهم شكل البالوظه

والست برضه ليها اللى ليها ، نفس الطريقه

عارفين نتايجه ؟ ولا أى معمل يكشف حقيقته

دا  العقم  وارد  لألف  واحد   من  كل   ميه

صناعتنا راكده ، زراعتنا ضايعه ودى مش جديده

محمول الحافى

مع انى عارف ان انت حافى

مش لاقى حتى تمن البصاره

أسمحلى اقولك ، تقدر توفر

انشالله حتى جنهين تلاته

واديها رنه على مزاجك

ساهم معانا ن كسبنا حاجه

علشان أكمل بنا العماره

***

يا سلام يا حافى لو خدت لوجو

لأكله دسمه ، كباب ، عكاوى

أو لحمه بيضا ، رقاصه ضانى

عينك ها تشبع وانا الم اكتر

واقدر ابدل  يختى  بأكبر

     إلى الشيطان ( شارون)     

       لو تعيش مليون سنه 

      ما تكفيناش نعذبك

        من الدمار والخراب 

       اللى عملته فى دنيتك

       رجمك حلال زى الشيطان 

        لكن محال نموتك

          علشان تدوق ذل وهوان

            تكره معاهم خلقتك

               وابن الشهيد اللى اتظلم  

            يشفى غليله من صرختك

              لو حتى بوست جزمته

              ولا لحظه ممكن يرحمك 

             *****************

 

قابلت صديقى القديم حسن عبدألله  ، بعد طول غياب ، فأنا قد سافرت للخارج وهم أيضاً كانوا فى السودان ـ وطنهم الأم ـ فهو سودانى يعيش فى مصر أغلب سنوات عمره وأبناؤه متزوِّجون ومستقِـرِّون فى مصر

وقد بادر بعرضٍ مغرى ويطلب منى أن أوافق عليه .

كان هذا العرض هو الذهاب إلى السودان وتنفيذ بعض الأعمال التى

 كنا نقوم بها معاً في الماضى قبل سفر كُلٌ مِنَّـا للخارج ، ورغم فشلنا فى تحقيق ما كنَّا نصبو إليه ، فإنه وعد ببناء ألقصور وجمع المال وتحقيق ألأرباح ، وكتبت ما كتبت.

يتشابه هذا الموقف مع مواقف المسؤل الذى يقبع سنوات فوق كرسيه ثم يأتى مؤخرا ليخدر الناس بأحلام وردية ،  وينسج ألأوهام  ، أين كان طوال السنوات الماضية

وهل هو قادر على تنفيذ الخطة الوردية فى سنوات قليلة لا تتعدى 1/5 السنوات التى قضاها

قابعا فوق صدورنا ، كاتما لأنفاسنا ؟  

 

بِتْـشَـخَّـر

 

أسمَـع كلامَـك أتأكِّـد

 إن إنت نايم بتشخــر

وإللى إنت شايفه فى أحلامك

 وقلت ده من أفكارك

 سراب صحارى ومش أكتر

 بتقولـه يمكن  نتخدَّر

وتلاقى قَـشَّه وتِتْـشَعْبَط

تخلَّـصك من جُـرم كبير

تخاريف لا يمكن تتحقق

بُص انت دَقَّـق وإتحَقَّـق

إزاى ها تعمل بعد يومين

إللى عجزت فى عمله سنين

وعلشان ما أحسنتش صنعك

وقت ما كانت الفرصه معاك

الكُـل أجْمَـع على نَبْـذَك

ورسموا صُورتك من ضَهْرك

******************

   

جدور خواجات 
 *********  
من يوم ما إتولى إسم الله عليه      
وإلناس حواليه هيا هيا معروفه    
 ناس بالواسطه ، بالثقه واصله      
مش  خبرات  ، أهل وإخوات      

  أصهار، أنساب  وذوات     
     محاسيب  زوجـات        
 شِـلِّة ل ولاد ، رجاله دادات     
  نفس  إلأشكال وإلمجموعه     
هُمَّـا لِوَحْدِيهم فى إلصوره    
عارفين بعضيهم بالثروات    
وأفقر من فيهم فى مارينا   
كلامهم مع بَعْض أفْرَنجِى    
مِش بِالعَرَبى    
 لِسانهُم حَوِّد عَ إلغَربى     
مزدوجى إلجنسيات     
وجدور  خَوَاجَات     
لما يسافروا     
بيخّبُّـوا إلباسبور إلمصرى    
عاشقين فى بلدنا ، فلوسنا      
 منهم لله ، مسحوا جيوبنا      

     نَاسْنَـا غَــلاَبَـة

     إيه إلي عَمَلتُه مُفِيد لِحَيَاتنَا

   جِبْت إلفَقْر و غَلا فِي إلعِيشَة

    بِعْت مَصَانِع قَطَعِت عِشْنَا

     وجَتْ لِنَا حَسْره مِن تَسْرِيحْنَا

   نَاس عَطْلاَنَه ولا لِيهَا شُغْلَه

     وصَايمَه يُومُاتِى طَالبين لقمه

     وناس مش لاقيه تجيب الهدمة

    وغصبن عنها  ماشيين حافية

    يخرب بيوتكوا دى ناسنا غلابة

    وحالها يبكى وحوش الغابة

     نص شبابنا بيمشى ويرحل

     علشان أوضه ولو في خرابه

       ياكلها بدقه وأهو بيتحمل  

    غربة وقلة ذوق ووقاحة

      في بلاد تانيه ناسها نماردة 

    ما هو ف بلده عوا طلى وعاله

        ـــــــــــــــ 

كِـبرت يا ابنى

كبرت يا ابنى وخاويتك

أقعُد معايا وخُـد راحتَـك

قول إللى تاعبك ، فضفض لى

ما هو إللى تاعبك يتعبنى

وانا الوحيد إللى أتمنى

أنك تكون احسن منِّـى

***

خللينى صاحبك ، إحكى لى

إسألنى دايماً وشاورنى

خُـد منى خبرة ونصيحتى

دا أنا ألوحيد إللى أتمنى

 إنك تكون أحسن منِّـى

***

إفتح لى قلبك ، قول همَّـك

محتاج ل آيه ، آيه ناقصـك

لو تحت أيدى ، أنت أُأمُـر 

لو مش بإيدى  ،  تتدبَّـر

وفى كل وقت أنا بأدعى لك

يستر حياتك وطريقك

وانا ألوحيد إللى اتمنى

إنك تكون أحسن منَّـى

***

فيه حد شاغلك ، بتودُّه

عزيز وغالى  وبيودَّك

   نروح لعنده ، ونخطب لك 

ما هوَّ فرحك يفرحنى

وانا الوحيد إللى أتمنى

 انك تكون احسن منِّـى

ـــــــــــــ

معـــاك ســــلاح ؟

معاك سلاح ، أنا أسمعك * وأعمل حسابى فى الكلام
لأغلط معاك وأنرفزك * وتبقى ليلتى مطيِّـنَه
وإللى تقوله بأنَـفِّـذُه * على عينى يمشى وبالرضا
وحتى لو كان كُلُّـه الغلط * بأضطر أقول ، حكم إلقوى
تبيع سراب ، لازم أشترى * ولو أمتِـنِـع ، بتذِلِّـنى
أرضى بالواقع وأنخِرِس * وبتحاصرنى وتِـفْـتَـرى

ولو مفيش ، يبقى أشتمك * وأتسَلَّـى بِـيك وأبَهْـدِلَك
وأدُوس عَليك وألعن أبوك * وإن قلت بِـم أنَفَّـضَـك
وإللى يِحُوش برضُـه أضربه * والمُعْتَـرض ، ها اشرَّحُـه
كلامى يمشى على إلجميع * حَسَـب قانُونِـى ، ولفَايدِتِـى
سفلقة  ؟؟؟؟
كُـل إللى عندك أأمِّـمُه * وأحْجُر عليك وأجِـيب شهُود
تِـشهد عليك ، وتحبِسَـك * وأحبس عيالك ، أجَنِّـنك
*****
العبرى عبَّـى الطيارت بدل الرصاص ركِّب صاروخ
يبـعَـتُه يدمَّـر بلاد يبيد قُـرى ، يقتِـل عِـباد
ولا حَد يقـدِر يمنعُـه عَنْـدُه إلذخِيره وإلعِـتَـاد
بتِـسندُه ياخـد إلقرار وينفِّـذه ، وهِـىَّ إلحكَــم
ويكَمِّـموا كبـار إلبِـلاد عاملوهم زى قَطِـيع بَقَـر
والعربى نَازِل فى حكايات وغُنَـا وحكاوى عن السلام
مع سـفاحِـين وأغبيـا ومفيش معانا غير إلحَجَـر
إلقوَّة فيـن يا مُـسلمين ياللى كلامكم كان حِكَـم
فى إلعصر ده كلام خَبَـل مُلَخَّصُه ، تِـفهَـم تِـدوخ
***********

صُـبيَـان عَـالمَـه
عَـلىَ طول  مسطول
وساعات  سكران
 ويوماتـى سهران
أنـا  والصُـبْـيَـان
نصرف  ألوفات من غير تفكير
ولا نتأثر
ألمـال موجود من غير مجهود
رُزْ  مبَـعْـتَـر
كُـلِّنا ضاربين فى خطوط هيرويين  
ومعانا  كَـاسات
 وفياسكــه  إزاز وصاروخ ملفوف
بِـغبارة  ... بالزيت 
كلها تهليس .. قعدات تخميس
 حوالينا  نسوان  أشكال وألوان
 مُـزَّات ، مَـزَّات
وإحنا وفايقين  بنكون مساطيل   
وألضحك إيَّـاه على أى كلام
ماحناش تايهين
دا  أحنا ألضايعين ، مهاويس تافهين
مافيناش عاقل
    إحنا  عوائل
على ست الدار
جايبانا ديكور ،  ترسم منظر
داه مُـش أكتــر
ساعة وللا إتنين
تدى محاضرات ، تعمل ندوات
 بتقول فى كلام
رَغْـى ومِـتْـعَـاد
 شِـلِّـة مقَـاطِـيع 
عَـمْلانا بَـهَـاوات  
مش بودى جاردات
لكن بِـطَـانَـات 
   عاملين  عِـزْوَه  وشغل أونطه 
بتسمُّـها ، صبيان عالمه
و كتير  تبعتنا  لمحاسيبهـا
نجيب الفِـرْدَة فى شكل هدايا      
 وأخر الليلة  ، بنسَـتِّـفْـهَـا
ألمَـاظ  مع مَـاس 
 والعُـمْـلة اكْـوَام  وبتتسلِّـم 
والباقى يتْـقَـيِّـد أول بـأول
على نُـص الليل  نِـبْـقَى فْضِـيـنا
نخرج وجيوبنا معبِّـيَّـه
من دا شويَّـه ومن دا شويَّـه
هىَّ بـتُـنُّـصُـب
 وإحنا نـهُـلِّـب
*****

لَيَه نايْمَـــه
يا أُمم مَتَحده لَيَه نايمه
  وألدنيا بِتِخْرب قُدَّامِك
صَدَّقْنا حاميها حراميها 
وِعْرِفتى إلكوسَه فى أحكامك
قوانينك عارجه ومِش ناويَه
 تجِيبيها البر بأعمالِك
إلارض يهود إغتصَبوها
 ولا شَعْره إتهَزِت فى كيانِك
وإلعالَم إلتَالِت بِمَاشَكْلُه
 وِمَدَابْحُه  تايِه عَن بَالِك
عَامله لْنا مَناظِر وأونْطَه
 وإلظُلم أهُو مالى قَرَراتِك
إشْمِعنى لوكيربى وِبن لادِن
  كَشضرْتى وبانِت أنيابِك
كَانوا لَيه عَمَلوكى مِن أصلُه
  مِحتاجَه تِراجْعِى أوراقِك

نسب يشرف

أنا واد كفاءه  وتحت  أمرك
كسيب وأشرف وعندى  شغلى
سبع  صنايع ورزقى  واسع
سباك  عمومى  ميكانيكى جايز
أهم  حاجه  لم  البرايز
تقلت  جيبى  وجاى  أناسبك
لا مؤاخذه  عندى أوضتين وصاله
بابهم  لوحده بقفل  صينى
بس  المنافع  مع  عيلتنا
بالعب  رياضه  فى أى  حاره
وعندى عقده من الزمالك
خدوها  سته  حلقولى أقرع
ومن ساعتها لابس  طاقيه
معلش  برضه باحط  ريحه
والجينز  عندى أهم  لبسى
ونضاره سوده بتاعة البوليسى
ودى  كل حاجه ، برضون سعيدا
محمولى عندى ، مستنى ردك

********************